本文重點
金融海嘯令唔少公司都要裁員減薪，不過最近就有間上市公司反而猛登廣告話要請人，講緊嘅係早排借殼上市嘅光匯石油（00933）。唔講唔知，光匯老闆薛光林對太陽情有獨鍾，唔單止公司名寓意匯聚陽光，仲連公司標誌都同太陽有關喎！
公司標誌設計有心思
光匯主要業務係搞石油貿易、倉儲同物流運輸，聽公司員工講，「光匯」即係匯聚陽光，寓意公司充滿活力同朝氣咁解；至於公司標誌就係模仿旭日初升嘅形態，象徵公司內部嘅熱力好似太陽升起咁慢慢向四周發放，兩隻主色喺中國都有吉祥嘅意思，當中紅色代表積極開拓，紫色代表穩定和諧，兩種顏色結合就係代表公司內部和諧咁解。
光匯員工話，薛老闆參與公司名同標誌嘅設計，唔多唔少反映咗佢嘅諗法，所以對公司未來發展好有信心。佢仲話近排公司仲登緊廣告請人，不過唔知係咪個職位太冷門，所以到依家仲未搵到合適人選，皆因佢哋請緊嘅原來係船長同大副喎。
余絲韻