本文重點
尋日華創（00291）宣布佢哋嘅執行董事兼副董事總經理鄺文謙及公司秘書李業華辭職，家陣搞緊私有化嘅華潤微電子（00597）非執董黎汝雄及集團首席法律顧問許亮清就接替佢兩個嘅職位，本月底生效。
黎汝雄頂上月薪廿萬
絲絲識得鄺文謙同埋黎汝雄，兩個都係實力派人物，亦效忠咗華潤系十年八年，今次鄺文謙嘅辭職的確令絲絲覺得有啲突然，事關佢上周仲出席緊股東大會，好有耐心咁答緊小股東同記者問題，一啲要走嘅迹象都無；但通告就解釋話，佢想休息一輪之後，再向其他事務方面發展喎。絲絲腦海忽發奇想，早排個市傳得好勁話中信泰富（00267）會喺紅籌公司中挖人去做佢哋董事總經理個位，唔知係咪有關係呢？
絲絲亦都有打電話畀黎汝雄，問吓佢即將上任嘅心情，點不知佢原來放緊假，喺澳洲同老友食緊飯，佢好坦然咁同絲絲講咗句「呢啲都係正常調動」，仲話返嚟香港再搵絲絲傾偈喎。通告內容仲提到黎汝雄有權收取嘅月薪約20.6萬元，而○九年度獲批嘅董事袍金每年係8萬蚊。
余絲韻