本文重點
多年來一直被台灣打工仔視為「最幸福企業」嘅全球最大半導體代工廠台積電，自去年底破天荒勁炒幾百人後，員工嘅幸福感已消失晒，網上亦多咗一批署名「台積電員工」嘅反對勢力，總係抨擊公司嘅一舉一動，對台積電形象嘅破壞力真係好大。
僅三成人肯回巢
就算董事長張忠謀喺兩個禮拜前認低威，公開道歉及請員工回巢，但依家都只有三成人肯吃回頭草，七成人對公司提出薪金、福利不變嘅回巢條件不為所動，當中大部分係資深員工，相信同遣散費要交番有關。有啲唔想返去嘅員工話，當初公司炒佢哋嘅理由係業績唔好，仲係排最尾百分之五嘅一班人，呢啲說話令到佢哋好傷心，而且好難喺同業搵番份工，所以唔想放低尊嚴去屈就。
但係都有啲搵唔到份正職嘅員工領情，仲話張忠謀咁有誠意，大家各退一步喇！不過佢哋都驚驚哋㗎！睇嚟張忠謀要諗計將員工嘅恐懼感變番「幸福感」至得。
余絲韻