本文重點
金融海嘯下，打工仔消費勁縮，面對呢個環境，美國星巴克亦有搞開源節流，除咗減人手及食品開支外，仲出信畀旗下位處美國各地超過7,000間分店嘅業主，要求減租20%至25%，以渡過今次經濟難關。
致函業主盼同舟共濟
以紐約為基地嘅零售租賃公司主席Faith Hope Consolo話，雖然無收過星巴克封信，但都建議收到信件嘅業主畀個租金折扣予星巴克，因為家陣時勢唔好，大家坐埋一條船，業主應該同零售商緊密合作，畀零售商有租金「休息期」，最重要係能留住個租客，無業主願意個場有咁多「吉舖」，因為咁樣會大大影響個場嘅人流。
星巴克發言人Darrow就話，早於一月已推出減租金行動，係整體削減成本計劃嘅一部分，以求上半年可慳番近2億美元，更期望到九月底財政年度結束時可減低5億美元成本。佢仲話減租幅度唔會「一刀切」，務求同業主達到雙贏局面。
市場分析話，今年第一季美國商場空置率創近10年新高嘅9.5%，加上美國樓價係咁跌，而商場等空置率又反覆上升，均會刺激業主主動給予租客減租，換取延長租約，總之務求同個租客「拍住上」。
余絲韻