本文重點
華創（00291）董事總經理陳朗尋日喺佢哋股東會嘅會後話，家陣嘅市場環境你真係估佢唔到，明明經濟大環境係差嘅，但佢哋嘅啤酒業務就零零舍舍跑出，銷售量升到嘭嘭聲，佢仲話可能係因為經濟唔好，啲人要借酒消愁啩？
東北人捧場貢獻唔少
佢哋公司嘅副董事總經理鄺文謙跟住就話，華創旗下「雪花牌」啤酒今年第一季嘅銷量大幅升咗成25%，比起同行其他品牌嘅銷售都高，要今年成為全球銷量最多嘅啤酒品牌，應該無乜難度。
絲絲都真係估佢唔到，記得喺九十年代，絲絲去過東北長春市，當時東北人好鍾意飲雪花啤酒，亦只係東北地區先有得賣，東北人好飲得烈酒就係人都知，但啤酒佢哋就好鍾意飲雪花，買親都成箱成箱，以一箱24支計，當時售價係兩蚊人仔一支，飲晒成箱都係50蚊有找，你話係咪抵飲，東北朋友最鍾意三五知己成箱成箱咁「乾」㗎！
十幾年後嘅今日，雪花已經畀華創收購咗，仲要咁好賣，雖然唔知真正原因係乜，但東北人一定貢獻咗唔少，佢哋對呢隻牌子真係好有感情㗎。
余絲韻