港股終於出現大方向，恒指前日起勢挾至接近萬八點，成交增至近900億元。指數急升，資金流入指數成分股，故見前日股仔炒風略減，但筆者相信，只要短期利好氣氛持續，重磅股同股仔會輪流炒作，股仔短線整固反提供上車機會。
早幾日，深圳市政府宣布，國務院已批准《深圳市綜合配套改革總體方案》，深圳市將在深化行政管理體制改革、經濟體制改革等六方面實現重點突破，市政府計劃於三年內逐步落實有關規劃。
受到相關消息影響，前日A股深圳概念股受追捧，反而本地深圳股未有大波動。但筆者相信，炒家唔會放過任何炒作機會，煲起深圳股只是時間問題，故今日股膽就選深圳控股（00604）。
深控主要從事地產開發及基建營運業務，隨着深圳市規模擴大，幾可肯定具市政府股東背景的深控，可迎來更大的發展機遇。再看股價走勢，在3至3.2元水平徘徊已久，估計短期可藉消息向上突破，跟進目標見3.8元，穿2.95元止蝕。
配搭其一選第一上海（00227），股價又是「待破」格局，周三收報1.13元，升6.6%。短期股市向好，金融股不論大小都有得炒，博中此股開車，料快見1.3元，穿1.05元止蝕。
另一腳選滙源果汁（01886），雖然可口可樂入股一事泡湯，但傳聞公司「追求者」眾，當中包括百仕通等基金，但能唔能夠開花結果，就要拭目以待。近期內地零售股有資金追捧，滙源股價亦已沉靜一段時間，亦是時候留意翻兜機會。
帥哥