大笨象（00005）在大行近日相繼唱好下升勢持續，周三再作升市火車頭，勁升5.7%，報收68.75元。雖然唔少大行轉口風，話睇番好大笨象，又調高目標價及投資評級，但「你戇」未有隨波逐流，堅持睇死大笨象，維持其目標價28元，仲建議趁家陣股價超高沽貨。另外兩重磅股，亦為假前升市出唔少力，祖國移動（00941）報收74.75元，升近5%，港交所（00388）則升6.3%，報收118.2元。
樂觀氣氛又受打擊
本地地主除「鄉下佬」（00017）逆市微跌0.2%外，其他地主全線做好，普遍升幅超過5%。紅色錢莊走勢亦強勁，建行（00939）單一大股東匯金，子公司中建投所持建行H股，將全數「過底」畀匯金，匯金直接持有建行逾五成股份，建行股價受刺激，升4.8%。中行（03988）升近一成，係大隻佬升幅亞軍。
不過，隔晚花旗魚缸插水，除咗通用汽車債券持有人唔肯蝕底，將債券換做普通股，通用可能因此要踏上破產之路外；隔晚花旗公債收益率上升，孖屐擔心企業借貸成本增加；加上問題銀行數目急升，華爾街缸邊友增添憂慮，爭相落車套利。花旗魚缸道指插水2%，險守8,300點水平，標普亦跌逾1%，資金流去買「火雞股」，納指只係微跌0.1%。今日本地魚缸乜命運，古勝烏卜卜，尋日亞太區魚缸唔見受花旗魚缸所拖累，東瀛魚缸更因為日圓走軟，出口股受惠帶動魚缸倒升散場，但歐洲魚缸則跌逾1%，情況唔多樂觀。油組堅持唔增產，「油魔」又發惡，隔晚重上60美元之上，更高見63美元，油價回升亦令花旗魚缸受壓。
雖然「油魔」復活，油價重拾升勢，更有斷估專家估計油價下半年將重見75美元，但日前有大行出吹水報告，指全球經濟見底復甦，料對航空需求回升，「高佬盛」跟「你戇」不約而同改變對飛機股的悲觀睇法，調升幾架飛機股的投資評級及目標價。
「你戇」對國航（00753）最睇好，將其投資評級由「沽售」調升至「跑贏大市」。吹水報告指透過祖國市場及兩岸直航所帶來的增長，國航相對大飛機（00293）的增長前景更理想。相反大飛機過往透過來往香江及寶島航線所帶來的增長，則會因兩岸直航而受影響。
今年有望轉虧為盈
較早前國航的話事人透露，受惠祖國的刺激經濟措施，預料國航今年可以扭虧為盈。國航老頂極有信心今年能夠虧轉盈，一方面因內地推出刺激經濟的措施，令到航空客運量復甦增加，同時國航在過去建立咗良好基礎，公司在全球經濟低迷及機票價格下跌中，維持正常經營。國航去年淨虧損逾91億元人仔，但在今年首季已恢復盈利，錄得9.81億元人仔利潤。北京航空巿場已出現反彈，加上國航的管理質素、成本控制較於東航（00670）及南航（01055）優勢，所以國航今年扭虧亦唔出奇，但要關注油價上升帶來的風險。
古勝