大行齊聲唱好魚缸
近日大行相繼唱好全球魚缸，繼「大魔頭」、「小魔怪」及「高佬盛」表示睇好後市後，又輪到「大魔頭」前頭號斷估專家碧斯，預測環球魚缸將強勁復甦，建議投資者買入新興市場股票，因新興經濟體的增長速度較快。碧斯亦表示，花旗華府救市料可推動經濟脫離衰退，花旗魚缸升勢料可延續，並指花旗魚缸可再有一至兩成的上升空間。
古勝一直強調現階段對魚缸不能過分樂觀，亦不可太悲觀，雖然暫無確實數據反映經濟實體已擺脫衰退，但魚缸一向走在經濟之前，近日魚缸的表現，或預示經濟好快回復活力，從谷底回升。不過各地魚缸自三月中在低位反彈，累積升幅甚為驚人，而魚缸回升，主要靠各地政府大開水喉，花旗聯儲局亦出手買入美債，扭曲息率長期維持在超低水平，驅使大量資金流入魚缸，若企業未能交出一份靚仔成績表，以目前多個魚缸的估值似乎略高，無平貨在手，現水平追入風險甚高，古勝建議待魚缸回吐，再把握機會趁低吸納。
期貨場周三結算，以目前形勢分析，好友已坐定笠六，在五月份再贏一仗，淡友連續三個月慘敗，呢兩日仲有無本事反擊，古勝烏卜卜。就算好友唔再進攻，淡友基本上已難以收拾殘局，皆因上月結算喺萬五水平樓下，即使結算殺落16,500水平，甚至萬六點，好友依然穩操勝券。
祖國國務院較早前公布石化產業調整和振興規劃，規劃期為○九年至一一年，較「十一‧五」規劃再前移一年。石化產業將保持平穩較快增長，並擴大油品和化肥儲備。呢個消息一爆出，中石油（00857）、中石化（00386）、中海化學（03983）、中化化肥（00297）呢類大型石化及化肥企業，都係振興規劃的大贏家。
新建產能推動盈利
中海化學截至去年十二月底止全年，錄得純利16.35億元人仔，按年升12.9%，公司派息亦十分慷慨，末期息按年增19%至9.5分人仔。集團在一一年至一二年將有較大規模的新建產能投產，料可帶動公司的盈利增長。加上阿媽中海油集團跟非洲突尼西亞一企業合作發展複合化肥業務，阿媽有意將業務重組後，出售部分股權予中海化學，市場一直憧憬注資或在今年內落實。
古勝