本文重點
上兩個禮拜，Baby手痕沽咗兩隻坐艇良久嘅「新股」，點知之後佢兩隻嘢好「生性」咁升咗80%同15%。趨勢大師大前研一講過，「人喺30歲前應該經歷3次以上嘅失敗」，佢認為無經歷過失敗嘅人很可怕，其實香港股民一日衰3次唔難。
日銀行一味推薦定存
任總喺出席迷債聆訊時話，本地銀行銷售員質素參差。不過，大前研一就相當欣賞香港銀行，佢嘅書有得分享，佢去咗好多間日本銀行，話畀分行職員知佢有300萬日圓（約25萬港元），所有人都叫佢做定期存款；跟住佢走去香港嘅銀行，結果分行職員問佢係乜嘢性質嘅錢，除此之外仲有幾多錢，呢筆錢可唔可以做高風險投資等，仲建議佢借多1,200萬日圓投資。大前研一痛感日本金融機構將注定被淘汰，講競爭力嘅佢認為，只識得推薦定存畀客戶嘅銀行員工，同快餐店職員無分別。
以TCE量度銀行資本
「末日博士」魯比尼認為，美國銀行「體檢」唔應該用一級資本充足率嚟量度銀行資本水平，而應該用較嚴謹嘅有形普通股本（TCE），而且TCE相對資產比率應達6%，而唔係坊間提出嘅4%，如果將呢個指標套落本地及中資銀行股身上，結果係點？
（Baby）