大市反覆 好淡通殺
港股兩個月間升近60%，但我見唔到普世歡騰，反而唉聲嘆氣嘅股友就遇唔少。今次《東方產經》網上民意調查問股友，近日恒指走勢反覆，窩輪及牛熊證市場更大殺好友淡友，你有否喺股市中損手？截至上周末晚上6時，有37.5%人話有損手，23.6%人就話力保不失，但亦有38.9%人反而有錢賺。
升市無錢賺，因為愈升愈擔心，買咗Put輪或熊證輸得仲慘，猛話畀大戶挾倉。股友陳先生話：「恒指升得咁快全因熱錢作怪，實體經濟未有好轉，後市都係睇跌，15,000點買貨，16,000點按兵不動，17,000點會沽貨。」
就連英皇證券荃灣分行經理高初定都話：「經濟未好，人工仲要減，個市點解會升？可惜好友挾上挾得急，淡友無力沽落嚟，隨時仲要挾上多一轉，但我估短期高位已見，下個月連15,800點亦未必守到。」
早前大市狂升，普遍都認為係「熱錢」所為，啲錢好可能嚟自大戶嘅對沖基金。「德國股神」科斯托蘭尼認為，市場走勢係由資金同情緒主導。身為小戶，資金唔夠大戶多，唔想再被挾，惟有多啲了解大戶點樣部署。
綜合多方資訊，對沖基金趁滙控（00005）世紀供股，搞「套戥」推低「香港獅王」見33元（除權前價格）嘅大茶飯後（唔明可翻查今年三月九日本欄），唔少對沖基金趁市場氣氛悲觀，密密坐認購期權（Call Option）長倉，再揸落唔少期指，然後一路推高滙控同港交所（00388）谷起大市，升近16,000點左右仲嚟個震倉，令更多股友入場做淡，然後再向上推，咁樣大戶就可以喺現貨同衍生工具市場兩邊賺。
有人認為港股成交上升，相信係傳統基金睇好而入市。但據知因為港股猛升，又臨近半年結，搞到傳統基金嘅基金經理只係焗住要入市，所以先有咁多熱錢流入香港。
舞高弄低 要識執生
講到呢度，我記起去年十一月喺呢度提過，玄學家楊天命話今年農曆五月將有「金融恐怖襲擊」，意謂有大戶衝擊股市，恒指有機會跌穿10,000點。唔通又中？其實大家都會明白，大戶炒高之後又可以炒低，而且熱錢一向「Easy come, easy go」（易來易去），所以我過去個多月一直強調港股會「急升忽跌」，自己執生。
恒指上周收報16,790點，一周跌3.45%，有人話係正式升穿250天平均線前嘅「整固」，但又有人認為係大插落嚟前嘅「死撐」。恒指17,000點算係高定低，只在乎你用31,958點定係10,676點做比較，呢種情況心理學家叫做「Anchoring effect」（定錨效應），即係分析時往往畀啲唔關事嘅數據影響。正如我去到非洲你會覺我癡肥，去到澳洲你會勸我增肥。
股價升定跌，長線始終睇盈利，比較依據唔係曾經發生嘅事，應該係將來會發生嘅事。唔少人話經濟已經由「Very bad」（好差）變成「Not too bad」（唔太差），所以利好股市，呢個都係Anchoring effect。不過，摩根士丹利亞洲區主席羅奇上周就話：「全球正陷入第二次世界大戰以嚟最深的一次危機同衰退，復甦仍要假以時日。」
參考200天線睇後市
上星期講完「200天平均線出入市法」，就有股友Email問我用喺港股掂唔掂？無論港、美股市每年都約有240個交易日，200天或250天平均線都係想代表大約一年嘅趨勢，日數短啲，發出買賣訊號嘅次數會多啲。我用○三年起至上周收市數據，每當恒指收市價升穿200天平均線，翌日做好倉，若跌穿就翌日做淡倉。以○三年一月二日恒指收報9,365點，長揸到上周賺約7,425點，但用「200天平均線出入市法」可賺11,268點，賺多3,843點。
最近我人生多咗個目標，原來去一轉太空旅行只係要20萬美金，唔係細數目亦唔算天價，畀啲心機應該搵到。嗱！攞10萬港紙做本出嚟炒，每日賺10%，只要29日就搞掂，係咪諗易過做？
（大健）
若然有料想報畀大健或有嘢問，可電郵money.biz@opg.com.hk。