本文重點
隻歐元真係一如所料，兌美元跌穿1.35，當然，入市前係睇住向下嚟做，入咗之後係咪一定要等到目標價先至離場又係另一回事，所以我都未等到佢穿1.35，就喺1.35廿幾平咗倉。都係一個原因，就係帳面差唔多已經有成百點賺，冇理由仲要冒風險博佢穿1.35，就係為咗賺多廿幾點而唔平倉，因為如果佢唔穿而又彈番轉頭，嗰廿幾點賺唔到，可能仲要貼多廿幾點，咁就無謂啦！
英鎊有機跌穿1.5
結果上星期五隻歐元跌穿1.35收市，個訊號好差，因為上星期一路都守住1.35，依家穿咗，後市有機會試1.33支持。歐元區四大經濟體首季GDP大跌，而法國就啱啱加入「衰退俱樂部」，照計歐元會繼續跌，今日一於吼佢上番1.35沽番先。
隻鎊上星期五揸咗一轉，執番40幾點，紐約市我見隻鎊谷住喺1.51八、九十，感覺會衝上去，於是擺咗個揸盤喺1.5215，結果隻鎊衝穿1.52，上到八十幾，後來我見佢回番去六十幾，所以平咗倉，尾市隻鎊穿番1.52，睇個樣今日要穿1.50，睇吓今朝有靚位沽番多少先。
蘇小妹