尋日大市繼續反覆上落，雖然恒指最終都能重上17,000點水平，但似乎呢個關口已岌岌可危。有消息指，上海有意設立國際板，吸引外資上市，令市場憂慮此舉再攤薄港交所（00388）盈利收入，因此港交所尋日就再跌5.85%，收報109.4元，為藍籌跌幅之最，沽空金額亦達6.99億元，連續第四日高踞沽空榜首。
至於市場另一焦點，莫過於是美銀正式減持建行H股（00939）一事，唔少投資者都認為是次減持事成，對建行不失為一件好事，最起碼少咗一啲負累，所以消息一出，建行股價亦即時反彈。
不過，依家市場上，好嘅股份都炒得七七八八，資金亦見流入最後一個板塊身上，就係細價股，相信連細價股都炒完之後，可再借勢炒作消息唔多，咁啱尋日內地就有報道指，上海「雙中心」建設將步入快車道，更表示「凡是上海能做的，馬上就推，馬上就試。」有鑑於此，料上海概念股相對會係較值得中線追捧對象，於是次大市調整時，不妨多加留意。
（小尾）