本文重點
對萬千莘莘學子嚟講，畢業禮係一個畢生難忘嘅日子，對於由滙豐贊助持續進修嘅一班智障人士嚟講亦唔例外，滙豐亞太區企業可持續發展總監區佩兒更親身到場分享佢哋學有所成嘅喜悅。
協助教授匡智學員
由○三年開始，滙豐慈善基金共資助咗241萬元畀匡智社區教育學院，呢間係全港第一間由商業機構資助，專為智障人士提供持續進修機會嘅學院。呢200幾萬對獅子銀行嚟講絕對畀得起有餘，最令絲絲感動嘅，反而喺滙豐有60位同事身體力行，共投入咗超過600個小時，協助教授唔同嘅課程，一手一腳帶大呢班智障學員。
區佩兒話，學院課程未來會循更專業化嘅方向發展，希望多啲智障人士透過持續進修，發揮潛能同埋提升職業技能。依家學院有6個學系，絲絲睇過都幾多元化，好實用，包括電腦、營養學、體藝系同埋旅遊系等。有啲學生喺畢業後已搵到工作，投身咗社會，俗語云：「天生我材必有用」，滙豐有教無類嘅精神值得一讚。
余絲韻