尋日老編同我講，話有個炒咗廿幾年嘅炒家好鍾意睇我寫嘅嘢，話好過癮喎，咁樣算唔算係「粉絲」呢？點都好，多謝呢位讀者多年嚟嘅捧場！尋日個市終於都爆喇，隻鎊上過1.53，歐元行得慢啲，但都見過1.37，隻YEN仲破埋97。
啲外幣咁樣挾法，無非又係炒經濟出現復甦迹象，而且壞消息炒得太耐，一有些少好消息，啲大戶就乘機做番轉頭，你話有中國因素支持咩，尋日內地公布嘅四月份貿易順差減到130幾億美元，出口都大幅減少22.6%，入口亦跌23%，即係除咗外圍需求減少影響出口之外，內需亦唔係好到可以吸收多啲外國貨，就算依家政策係要刺激內需，我睇主要都係幫襯番自己人。不過，中國係咪唔使靠出口都可以恢復強勁嘅經濟增長？好明顯唔係，咁即係仲要睇外圍，外圍係咪好景唔使問啦。不過，炒匯志在搵錢，尋日隻鎊挾穿1.53之後企喺1.52八十幾，我喺1.5288沽咗一手，始終今日英國公布就業數據，等佢落番1.5150先揸過。
蘇小妹