本文重點
近期樓價急升，好多拍賣會都因為業主臨場調升底價而令成交縮減，不過，銀主盤就比較少見此類情況，環亞物業拍賣昨日推出的兩個銀主盤全部獲買家承價，好似屯門愛琴海岸7座高層D室，成交價240萬元，較市場估值的260萬元低近8%。另西貢蠔涌村1幢村屋，開價498萬元，由於供應少，最終被搶高62萬元，至以560萬成交。除咗銀主盤，同場一個青衣曉峰園5座低層單位，以近市價嘅290萬元成交，呎價3,049元。
喜帖街重環保 成本增
將會喺下個月截標嘅灣仔喜帖街重建發展，市建局日前話會引入全方位環保設施，該局老友同Vincent講，早前已經畀咗發展商嘅標書，並無詳細講明啱啱落實嘅六大環保政策指引，故稍後會向發展商補發補充資料；而有發展商老友話，要多起環保設施，建築成本一定會高咗，但由於額外成本係由該局支付，所以無減低投資吸引力。
發展商老友仲話，喜帖街包括主題商場同公用設施，發展較複雜，今次再加環保設施，會增加發展難度同成本，不過全部都唔係大問題，入標與否最重要係「計數」。
（Vincent Lau）