長假回來後的港股，繼續大挾淡倉，恒指大幅飆升，唔單只要升穿16,000點水平，仲要大挾一班熊仔熊女，最終全日就有96隻熊證被強制回收，而恒指全日亦升860點，收報16,381點，成交金額達到803億元。
受惠大市做好，尋日一眾股份都見上揚。當中波羅的海指數上周五揚升，消息刺激尋日航運股齊齊做好，升幅較多的有中遠控股（01919）以及太平洋航運（02343）。除此之外，尋日資源、航運、水泥以及煤炭股亦備受資金追捧，不過由於大部分股份已錄得一定升幅，追入亦存在一定風險，因此宜小心為上。
至於市場消息方面，雖然有消息指，四月份的國家消費物價指數以及生產物價指數，其降幅將有機會齊齊進一步擴大，但就似乎仍無礙股友們入市意欲。據知，四月份京滬深住房成交量均創下新高，亦都從而證明內地樓市的小陽春行情還在延續，難怪尋日內房股升幅都咁犀利，中渝置地（01224）以及合景泰富（01813）更先後打進升幅榜中添！
（小尾）