本文重點
時勢艱難，好多企業見無乜生意，都決定向員工實施無薪假，慳番啲營運成本。不過恒生銀行（00011）就好唔同，業務無減少之餘，仲由舊年開始增設每年一日嘅「義工假」畀班員工，令員工貢獻善心之餘亦無後顧之憂。絲絲睇佢哋份企業責任報告，發現原來佢哋無論有冇「義工假」，都係咁落力做義工，唔怪得就快離任嘅柯清輝都特登嘉獎呢班義工。
去年貢獻1.1萬小時
為咗嘉許同鼓勵員工積極參與義工服務，恒生去年新增設「義工假」，適用於恒生義工隊同其他認可義工服務。公司有個咁好嘅福利，成班員工都再努力啲做義工去報答公司，舊年就共貢獻出1.1萬個小時參與義務工作，較○七年多咗14.5%！
恒生去年仲連續第二年同長春社合作，人才濟濟嘅義工隊遠赴雲南省，協助興建300個沼氣廁所，為約1,200個村民提供再生能源，令當地每年可減少砍伐750噸柴，同埋3,750噸二氧化碳嘅排放。依家好流行講企業責任，絲絲見好多商界除咗搞生意賺錢之外，搞環保、做慈善都咁不遺餘力，的確抵讚！
余絲韻