本文重點
鴻運當頭嘅寶島富豪郭台銘認真風騷，佢囡囡出世好好腳頭，台股即刻受惠於中資投資台企而升到巴巴聲，但佢都係有啲條氣唔順，點解？事關美國股神巴菲特想入股佢嘅「對手」比亞迪（01211），佢透過傳媒向巴菲特隔空提出咗3個問題，如果巴菲特唔回應，佢會買一、兩股巴郡股票，明年一定去股東會踩場，同股神當面對質。哇！都幾重火藥味喎。
質疑股神入股「對手」
佢嘅3條問題，首先係巴菲特成日都話只會投資有潛質嘅公司，但點解投資比亞迪呢？第二個問題係，巴菲特敢唔敢揸比亞迪嘅車日日返工放工呢？
第三就係啲大車廠投資油電混合車要好耐先可以賺錢，巴菲特又用啲乜嘢專業去判斷比亞迪嘅潛力呢？
郭台銘仲話，比亞迪絕對唔係佢公司嘅對手。比亞迪令到呢位台灣數一數二嘅富豪咁火滾，係由於佢旗下嘅富士康，○六年時喺深圳法院同比亞迪打知識產權嘅官司，雙方好激咁纏訟咗3年。不過絲絲係度諗，其實郭台銘應該仲要質問股神，點解唔入股富士康呢？
余絲韻