本文重點
上星期二喺1.4562揸咗一手鎊，博佢衝1.50，上星期四雖然仲差53點先至到，但係我梗係唔等啦，最後喺1.4922止賺，執番360點。你問我點解唔等佢試埋1.50先至平倉？
第一，1.50呢個係心理大位，就算升穿都唔會即刻破位，其次，亦係好多散戶犯嘅錯誤，就係一定要到目標價先至肯食，就算只係差幾點。其實咁樣好蠢，就算差十幾點未到目標，但有冇諗過，畀埋你咪賺多十幾點，但如果唔到目標就回頭，你隨時會冇咗幾十點。有句話叫：一鳥在手勝過千鳥在林，都係賺咗先穩陣啲。
炒匯唔同做定期
好彩走咗，因為上星期四隻鎊又跌番去1.47。炒匯一定要食個波幅，如果唔係，就同擺錢入銀行做定期冇分別，但炒匯涉及槓桿，有錢唔賺就要面對虧損嘅風險。上星期五早段隻鎊喺1.4750至1.4800橫行，我見下晝倫敦開市後冇隊穿1.4750，反而抽番上去1.48，於是喺1.4811揸咗一手，之後喺1.49廿幾平倉。睇嚟今個星期仲會上，但上次喺1.49揸貨揩過嘢，所以今日都係等歐洲開市後，先至決定追唔追揸。
蘇小妹