本文重點
絲絲早排同華潤電力（00836）首席執行官王帥廷傾偈，佢講起之前喺北美洲出席路演嗰陣，有個日本「芬佬」失驚無神走嚟多謝佢幫手養大幾個仔女，當堂嚇咗王總一跳，大家溝通咗一輪，先知原來呢個日本「芬佬」買咗唔少潤電股票，仲帶挈佢賺唔少錢養家添！
潤電「粉絲」多謝帶挈
絲絲聽王總話，呢個日本「芬佬」買咗幾多潤電股票就唔方便講，不過佢都真係可以算係潤電一個唔小嘅股東，佢仲同王總講，佢自己嘅投資組合入面有超過一百隻來自世界各地嘅股票，裏面股票嘅投資比重周不時都會加加減減，唯獨係潤電係有買無賣，每年仲keep住佔佢個組合一半嘅投資回報，所以至會話王總幫佢手養大啲仔女囉！
俗語都有話「無心插柳柳成蔭」，王總話佢工作嘅時候只係諗住要做好件事，無乜諗過會有人多謝佢，佢仲話雖然好多上市公司主席都鍾意將「為股東創造最大回報」呢句話掛喺口邊，但都係畀人多謝嗰一刻嘅感覺先至最實在嘅！
余絲韻