本文重點
前日喺1.4562揸咗一手鎊，雖然仍然可以跌到1.45十幾，但始終都守住1.45，之後仲升番轉頭，紐約開市前已重上番1.46，雖然仲係反覆，但似乎已經出現雙底形態，之後仲因為美國公布嘅四月份消費者信心指數升到上去39，里士滿聯邦銀行製造業指數跌幅亦收窄，英鎊升到上去1.46七十幾。
前日我入咗市之後一直按兵不動，因為隻鎊早幾日好有規律，歐洲開市就隊落去，紐約市又彈番起，但喺第二日東京市又插番落去，跟住喺歐洲市再隊，如是者應該都玩咗三日。所以，如果尋日朝隻鎊仲守住1.46，已經可以肯定隻鎊會升番轉頭。
艇友捱唔住要止蝕
講番前晚，珍妮花同我講，佢個朋友拉勻喺1.46六十幾揸咗五手鎊，但前晚隻鎊抽上1.46七十幾八十冇走到，反而喺佢試番1.4650時剪晒，之後又喺1.46七十幾八十揸番。咁我更加認定隻鎊會升番轉頭。果然，尋日隻鎊守住1.46，之後仲破1.47，睇嚟今次破硬1.50，一於揸住先！
蘇小妹