本文重點
本港發展商賣樓觸覺一向敏銳，正當豬流感陰霾籠罩全球之際，有發展商隨即將旗下樓盤與健康生活扯上關係，希望藉此加強宣傳及吸客，新世界（00017）營業及市務高級經理劉仲良昨同Vincent講，為配合社會關注生活衞生等問題，公司今日將公布有關元朗翹翠峰的健康生活最新賣點，當中包括向大眾推介樓盤內大量綠化環境及單位圖則設計等。
蚊型樓價量齊飆
劉仲良話，今次仲會同時公布翹翠峰最新跨假期的推廣計劃，目前該盤累積銷情已直逼300伙，平均呎價逾3,000元。
Vincent記得，早於○三年爆發沙士時，本港唔少發展商均趁疫情之下，紛紛為旗下樓盤引入一些抗疫或健康生活嘅創新賣點，當中包括單位間隔特別「通風」及渠道設計等，成功吸引唔少買家注意及青睞。
近兩個月樓市出現小陽春，連帶價值50萬元或以下嘅蚊型樓交投亦暢旺。利嘉閣研究部周滿傑話，三月份錄到120宗蚊型樓成交，涉資約3,791萬元，分別按月升38%及19%，而成交量更係近十一個月嘅新高，成交額就係近三個月新高，而以地區計，屬蚊型樓集中地嘅新界區，成交量升幅高達六成，為各區之冠，至於已知入貨價嘅成交中，以九龍城2C號一B室單位賺幅最高，單位三月以32.5萬元售，比九五年嘅25萬元購入價高30%。
（Vincent Lau）