隨着豬流感在各地的疫情，以及確認感染個案都有上升之勢，港股走勢亦都有繼續向下迹象。加上尋日《華爾街日報》指，花旗以及美銀在初步的壓力測試下都唔合格，在需要面臨進一步注資底下，昨日一眾金融股跌幅就再度擴大，拖低大市整體表現。
此外，尋日中行（03988）同埋交行（03328）都公布咗今年首季的盈利表現，雖然表現各異，中行首季純利按年下跌14%，而交行期內純利則微升0.53%。不過要數業績最令人意外的，始終都係投資收入差於預期的平保（02318）。
講開金融股，雖然尋日高盛所持工行（01398）的股權解禁，但就未見高盛有任何舉動出現，但安聯同美國運通就透過私人配售方式合共出售逾38億股工行。另市場亦傳出，尋日有基金意欲配售新地（00016），仲曾經一度試過盤添，不過都係嗰句啦，雖然消息並未得到證實，但係相信及後仍會惹來一陣沽壓，因此股友們要留意啦。今日期指結算，相信大市走勢會一如預期般波動，大家要小心啦。
（小尾）