本文重點
由曾於《福布斯》中國富豪榜排名13嘅張揚任主席嘅國中控股（00202）停咗牌兩個幾月，尋日有驚人公布。話說國中去年十二月宣布出售湖南長沙地產項目（ICIM 100%股權及CIC之38.9%股權），集團尋日公布，聯交所今年一月接獲投訴，指CIC喺股東特別大會前已轉手，經顧問及財務顧問調查後，發現有關項目喺未獲董事會授權下於去年十一月轉手，張揚亦真係於去年十一月六日辭任CIC嘅法定代表及董事，而有關交易更獲長沙市商務局批准添。
通告澄清誤譯「辭職」
國中仲話，發現董事喺附屬文件上嘅簽署是於欺詐情況下簽，所以懷疑當時有CIC中國僱員以董事嘅名義簽署文件，更懷疑呢名僱員用偽造嘅公司印鑑添，集團已馬上喺長沙報警。公司為調查呢件事專登成立咗一個獨立調查委員會，當中委員會建議張揚立即辭職，但遭張揚拒絕。
不過公司發咗呢個通告後嘅12小時，又發多個澄清通告，話將「Take Leave」一詞誤譯作「辭職」，所以委員會應該係建議張揚「休假」先啱。點都好，本月初國中已有兩名獨董「跳船」，睇嚟事件只係剛開始，但小股東只有齋等，皆因股份唔知幾時先復到牌。
余絲韻