本文重點
金魚缸瞬息萬變，投資者真係少啲智慧都唔得。「商品大王」羅傑斯最近就告誡各位股民，投資最緊要靠自己分析，千祈唔好信華爾街分析員，至於嗰啲上市公司高層講嘅嘢更加唔可信，隨時會令你輸晒副身家。
信董事長渣都冇
點解對上市公司老闆講嘅嘢要咁小心？羅傑斯話最大原因就係佢哋同你講嘢嘅目的，無非係想左右你，攞走你啲錢，所以揀股票一定要自己分析，認真研究間公司嘅基本面、現狀同歷史，當所有人都話好嘅時候，就要考慮拋售。如果輕易聽信上市公司董事會秘書嘅說話，你啲錢就會冇一半；如果聽董事長嘅料炒股，更加可能連渣都冇得剩。
羅傑斯話，自己早年投資都有過慘痛經歷，喺七○年因為睇錯市輸到剩番幾件衫同一架二手電單車。嗰次失利令佢明白嘅道理就係，除非知道自己做緊乜嘢，否則就一動不如一靜。
至於依家個市，佢始終睇好大宗商品價格，相信喺各國狂印銀紙嘅影響下，實際資產嘅價格會愈來愈高，不過佢就叫大家唔需要通過正式嘅商品市場去投資，可考慮買入啲生產原材料公司嘅股票。
余絲韻