依家除咗隻YEN比較單邊之外，其他貨幣可以話完全冇方向，唔知市場係咪觀望緊，豬流感會唔會比金融海嘯更快爆發第二波。你睇吓隻鎊就知，前日喺歐洲市跌到1.4515，到紐約市又挾番轉頭，仲破頂升到1.4695，以為佢出現咁強嘅單日轉向訊號，仲唔上番1.47？
點知又係上唔到，夜晚點幾鐘跌番去1.46三十幾。Jenny尋日晏晝打嚟問我係咪可以揸鎊，我話：「你去旅行仲入市？咁博做乜？」佢話：「擺晒盤咪得囉。」我話個市好波動，就算擺晒止賺止蝕，都可能好嘅唔靈醜嘅靈，如果真係要博，都係小注玩吓算。我見英鎊兌美元星期一雖然裂口低開，但沽壓唔算大，尋日倫敦開市後都冇再隊穿星期一個低位，所以後來喺1.4562揸咗一手，穿1.45就止蝕先。
歐元明顯弱啲，好彩守住1.30心理關口。澳、紐元再跌就預咗啦，話晒澳洲同新西蘭以出口原材料、農作物同肉食為主，豬流感影響大啲，依家市場冇方向，暫時短炒住先。
蘇小妹