另方面，在聯儲局下周一公布當地錢莊壓力測試結果前，《華爾街日報》先放料，指花旗集團跟美銀為強化資本，或有集資需要，消息拖累道指期貨插水百點，令亞太區魚缸跌勢加劇。
本地魚缸在好友最後努力下，早段曾高開，並重返萬五點關，高見15,078點，但外圍魚缸表現曳，本地魚缸難以獨善其身，恒指隨即掉頭回落，下半場更曾低見14,457點，跌逾380點，報收14,555點，跌近2%或285點。祖國魚缸軟弱無力，國企指數亦跌1.8%或156點，報收8,485點。
花旗錢莊虛不受補
有斷估專家認為聯儲局今次壓力測試的準則較為寬鬆，若然呢個情況下仍未能通過測試，今年餘下日子，花旗啲錢莊仲難捱。花旗集團跟美銀已獲官府狂打補針，但仍要向市場伸手，都咪話唔大鑊。亞太區的金融股仆直，古勝執筆時，歐洲的金融股亦拖累歐洲魚缸插水。
大笨象（00005）昨日險守50元，報收50.45元跌2.5%。至於紅色金融股個別發展，美銀所持的建行（00939）股份將於下周解禁，既然等錢使，唔排除又要沽貨套現，但建行昨日僅跌0.7%，口痕友話披醒前股價要死撐，加上工行（01398）披醒唔死得，建行當然有運行。至於工行的兩大策略股東啤酒國安聯跟花旗運通，已分別配售32.2億及6.381億股，涉資逾155億元。由於工行批盪有祖國芬佬接貨，披醒未對工行沽壓帶來打擊，工行昨日逆市升2.4%。缸湖傳聞「高佬盛」所持工行部分解禁股，亦會在今個長周末前搞批盪，古勝又即管睇吓工行跟建行撐得幾耐。
平保（02318）派首季成績表，純利大跌72%，表現遠差過祖國野獸（02628）及市場預期，平保盤中股價跌一成，報收45.25元，跌近9%。祖國野獸跌2.8%，報收25.85元，古勝認為有貨在手不妨先套現，皆因豬流感一旦殺入祖國，隨時死得人多，保險公司賠錢賠到手軟，又係一個沽貨藉口。
加快發展海外市場
豬流感對亞洲呢邊有幾大影響，古勝烏卜卜，不過尋日藥業股繼續落鑊，飛機股就不停沉淪。藥業股有幾多真正受惠，在下唔敢講，但神秘病毒殺到埋身，肯定令唔少怕死之人減少出街，當然係為咗唔同其他人接觸。唔見面接觸，但一樣要過活，相信透過電訊以及互聯網聯絡的次數激增，今日留意阿里巴巴（01688），作為祖國B2B網站龍頭，豬流感呢單嘢，話唔定因禍得福。
阿里巴巴主要為中小企業提供電子商貿平台，基本因素方面，集團仍然能保持較高速的增長，去年營業收入同比增長近四成至逾30億元，而實際淨利潤亦同比增長近九成半，至逾12億元。
阿里巴巴早已表示會加快海外市場發展，其中重點係花旗市場，豬流感源頭係美洲，阿里巴巴今次擴展海外市場，可以話係順水推舟，時機啱啱好。
古勝