本文重點
由於豬流感可能會殺到香港，加上有代理行睇淡商廈及豪宅後市，最近唔少老闆都想快快出貨，有老友同Vincent講，一個老牌資深投資者剛向地產經紀落「柯打」，將旗下大批靚商廈單位，連同港島多個豪宅單位大幅打折放售，個別物業六折都有得諗。
有前輩話，雖然現時大家都煩緊疫症會唔會傳到香港，但危中有機，可能依家先係執平貨嘅時候。
天水圍站減建無得傾
另世邦魏理仕報告指出，上季中環商廈租金已跌到好殘，平均呎租僅約八十四元，按季急瀉超過兩成，估計今年底前累積跌幅仲有兩成；而現時該區空置率升到去百分之五點四三，按季多咗差不多四個百分點。
至於整體港島豪宅平均呎價僅一萬三千五百七十元，按年跌逾兩成七。
香港物業愈起愈密，令市民甚為關注屏風樓問題，有元朗區議員同Vincent講，發展局落實降低西鐵元朗站物業發展嘅密度，所以都希望政府可關注同屬西鐵沿線嘅天水圍站物業發展，由於項目嘅規劃許可在二○○○年二月獲城規會批准，市民在環保意識已有好大改變，故在天水圍站起八幢四十層高嘅屏風樓，根本不合時宜，因而在早前向發展局提出建議，希望可以好似元朗站咁減建約兩成單位，不過，該局近日就已經回覆話，天水圍站已有核准嘅規劃方案，無計劃削減密度，結果令人失望。
（Vincent Lau）