蘇小妹喺匯市搵到啲錢，所以去咗旅行話獎勵吓自己，揀呢啲日子去，可以避開復活節人潮，旅費又可以平啲，佢真係識計數；呢兩日由我珍妮花代筆，同各位看官講吓艇仔實戰。前晚美國公布嘅三月份整體零售銷售較二月份跌1.1%，而扣除汽車後嘅三月份整體零售銷售則較二月份跌0.9%，顯示美國消費市場依然疲弱。見到咁嘅數據，於是喺1.4910沽咗一張鎊做短Trade，跟手喺1.4860平倉，賺佢50點算數。
話時話，早排如果美國數據差，啲外幣一定跟住落，不過依家啲外幣開始唔跟呢條Rule嚟行；以今次為例，隻鎊隊咗幾十點就返番上去1.49，好彩我肯食胡，如果唔係就倒輸番畀佢。俗語話，有食唔食罪大惡極。昨朝起身見鎊企喺1.49樓上，唔上唔落咁，八點幾鐘隊穿咗1.49，望咗幾分鐘，見佢隊極都唔落，於是喺1.4885揸咗半張，九點幾喺1.4915平倉，叫做搵番昨日嘅飯錢。尋晚比較重要嘅數據係三月美國消費物價指數，市場預期較二月升0.1%，數據前匯市應不會有太大波動，但數據公布後可能不利美股，亦可能令外幣由高位回調，澳元及紐元已由前晚開始出現整固。
珍妮花