本文重點
環球金融海嘯之下，基金經理個個無啖好食，一有生意自然爭崩頭去做，何況仲係中國投資呢間水頭仲咁充足嘅大公司，怪唔得之吸引四百幾個基金經理湧住去，可見搵食真係好艱難！
要爭到呢盤大生意，基金經理本身都要有番咁上下斤両，點解？因為呢班人要攞中投嘅牌，淨係呢個牌分分鐘帶嚟1億英鎊收益！絲絲打聽之下，收到風話有廿幾間國際性投資公司入選，最後中投揀咗標準人壽投資、安本資產管理同埋Martin Currie呢三間英國嘅基金公司，雙方仲就快簽約！
前車可鑑唔衰得
據講中投今次對投資嘅運作高度保密，仲要求呢幾間公司要簽署合約，講明唔可以披露資料！之前中國機構「出海」投資海外機構，個個都可謂損手爛腳，所以今次中投好重視基金公司嘅質素。
今次中投咁慎重揀蟀，就係要搵一班真正專業嘅投資專家，以免再中招咁話！
余絲韻