本文重點
內地金融業高層嗰份「天價」人工，被內地網民狂「鋤」咗好多年，成個金融業幾乎成為全國人民嘅公敵。財政部尋日終於出聲，要求所有國有金融機構高層○八年嘅人工至少減一成，算係回應咗大家咁多年嚟嘅不滿。
國企高層最多九折支薪
查實好多國有金融機構老細已事先響應咗，好似建行（00939）選擇減一成嘅「最低消費」，國壽（02628）老細楊超就減咗一成半。
平保（02318）雖然唔係國企，但係佢哋董事長馬明哲舊年被人由年頭鬧到年尾，因為佢攞咗6,000幾萬，「不小心」成為全國最高人工嗰位。佢去年初仲好勞氣咁反駁，今年就認低威，自動分文不取。
同往年業績會相比，今年平保管理層人工已經唔係熱門問題，但尋日記者會臨結束前，都係避唔過被內地記者揶揄。有人問馬明哲○八年支取「零人工」，係咪同屋企人交代咗？坐喺絲絲附近嘅總經理張子欣、首席保險官梁家駒等個個都忍笑。佢哋人工都勁減咗，絲絲斷估唔係幸災樂禍，睇嚟都係笑佢「難逃一劫」啫！
余絲韻