本文重點
金融海嘯爆發之後，Vincent行街都發覺多咗吉舖，門口仲貼滿代理嘅出租同出售告示，部分更加話係「直達業主」，不過就得手提電話號碼，連邊間代理行都無寫，同埋堆積嘅廣告紙都成寸厚，萬一跌落嚟，隨時「責」親人，所以地監局近日向業界發出通告，希望代理界可以自律。
地監局老友話，代理貼出嚟嘅街招好多時都話「直達業主」，但查實所謂嘅「業主」只係代理，唔係業主，所以有誤導成分，加上在私人土地未得業權人或食物及衞生局局長書面批准，係唔准貼街招或海報，所以今次向業界發出通告，提醒一下。事實上，代理貼出嘅街招一向有晒聯絡電話可以追罰款，隨時可以好似亂拋垃圾咁，被罰款一千五百元或以上。
新都城賠訂重售賺得少
Vincent聽中原李玉祥講，一向以來業主願意賠訂重售，起碼帳面上「執」多十幾萬，先可抵銷風險同使費，不過將軍澳新都城有一宗賠訂重售個案，原業主只係帳面賺多八萬元。
單位係一期二座中層五百一十一方呎Ｆ單位，單位原以一百八十萬元售出，其後以約一百八十八萬元重售，扣除使費相信實際無幾多錢落袋。而美聯王偉明亦話，鰂魚涌華蘭花園玉蘭閣中層Ａ室，剛以二百六十萬元售，原業主賠訂重售帳面賺多二十七萬元，扣除使費有八萬元落袋。
（Vincent Lau）