本文重點
地方政府近排連番推救市措施後，令多個內地一線城市嘅樓市出現難得一見嘅小陽春，好多本港投資者又再蠢蠢欲動，想重投祖國懷抱賺番一筆。不過，金占士奉勸大家要小心行事，因為內地國情有別，好多已出台政策根本未能落實，賺唔到錢事小，隨時令你投資嘅血汗錢進退維谷，想走都走唔到。
退唔到訂又過唔到戶
事關金占士有個朋友一向鍾情房地產投資，喺深圳早有住宅揸手，近排樓市回暖，又見廣東省政府近排取消對港澳台人士限買一套房嘅限制，呢位朋友喺地產經紀慫恿下，急急腳叫埋大班親戚朋友一齊上深圳購買心頭好。
殊不知落完大訂，到國土局過戶時，先有官員話未收到文件不予辦理，而之前拍心口話一定冇問題嘅地產經紀，亦即時轉軚表示愛莫能助，搞到呢位朋友退唔到訂又過唔到戶，還要擔心限期內無法完成交易會被業主「殺訂」，一時間欲哭無淚，不知如何是好。
其實金占士都有見過這份省政府的文件，只要上官方網站就可以看到，其真實性不容置疑，只不過以往就算係「阿爺」政策，地方政府都經常是「上有政策，下有對策」，今次深圳國土局話呢份省政府三月頭正式出台文件，到現在還沒有收到也真是不足為奇。
聽呢位老友講，近日出入國土局，日日都可以見到中招嘅香港同胞，難免令金占士懷疑，如果內地樓市小陽春係靠呢招「谷」起來的，唔知道可以維持幾耐？