本文重點
上海被「阿爺」欽點為國際金融中心，香港唔驚就假。Baby上星期去咗上海，其中一站係周圍都係地盤嘅陸家嘴，今次唔去金茂大廈，而係去旁邊樓高一百零一層嘅上海新地標——環球金融中心（SWFC），Baby叫佢做「汽水蓋」（大廈頂部有個洞）。「汽水蓋」七十九至九十三樓係一間五星級酒店，由八十七樓大堂望番落金茂同黃浦江，感覺真好（根本唔使畀百五蚊去一百樓觀光廳）！
摩天大廈不利經濟？
其實Baby唔鍾意摩天大廈，起初唔係幾接受樓高八十八層嘅香港國際金融中心（IFC），因為佢好似破壞咗港島山脈嘅天然曲線，但係今次見到上海有座「汽水蓋」，唔知點解有種香港給比下去嘅感覺，原來金融中心係需要Skyscraper嘅！德銀喺九九年出過一個「摩天大廈指數」，俗稱「摩天大廈詛咒」（Skyscraper Curse），歷史顯示，每當全球最高大廈落成，經濟亦即將衰退。幸好去年落成嘅「汽水蓋」高唔過台北一○一（層樓跟「汽水蓋」一樣，但更加高），將會係全球最高嘅杜拜Burj Dubai建築工程亦已被叫停。
Baby買咗份標榜畀內地中產家庭睇嘅周報，該報社辦咗個香港金融考察團畀讀者參加，四天行程盛惠六千一百八十蚊人仔，睇嚟內地高質素嘅散戶將愈來愈多。上海和深圳目前合共有一千六百八十八家上市公司（Ａ股及Ｂ股），市值逾十六萬億元人民幣；香港則有一千二百六十六家上市公司（主板及創業板），市值逾十萬億元。
回程時坐磁浮列車去浦東機場，時速四百三十公里；回家坐香港機場快線，時速一百三十五公里。