最近歐洲有科學家透過人造衞星發現宇宙中有大量未知物質，有人就與Dark Matter拉上關係。話說幾年前有物理學家計算宇宙中物質總量時發現，原來一向熟知嘅元素「原子」只佔宇宙2%至5%，其他未知嘅神秘物質被稱為Dark Matter。
勿被「好消息」搞亂分析
我覺得股市都有Dark Matter，天大地大，數唔盡咁多因素影響股市，一、兩個利好消息可能只係整個畫面嘅一小部分，睇真啲可能完全唔同。上周環球股市再升，主要因為G20峰會「圓滿結束」，加上美國財務會計準則委會員（FASB）通過放寬按市價入帳（Mark to Market）的要求。港股無出現我擔心嘅連升3周斷纜事件，恒指上周收報14,545點，一周升3.02%，連升4星期。
上周去咗信誠證券尖沙咀分行，經紀郭小姐同我講：「雖然個市比以前難估，但仍然睇好後市，因為美國不斷會有救市措施推出，一定有所幫助。」不過，信誠證券銷售經理林先生話：「依家個市偏向走落，散戶最緊要多研究股市同做功課，其實依家最好唔炒股，留番啲錢去旅行仲好啦。」
如果你信股市有Dark Matter，就唔好輕易畀一小部分畫面混淆視聽，搞亂對大方向嘅分析。先講市場對G20峰會成效嘅反應，表面上大家覺得今次峰會達到目的，所以修改對經濟前景嘅悲觀睇法。其實你見到乜嘢具體措施挽救經濟呢？你可能聽到好多嘢，但係振興經濟要打動大家消費同投資。你不妨諗諗呢堆你唔識嘅語彙，加多堆你睇完個名都唔會明嘅方案，係咪做到以上效果。
再講FASB通過放寬按市價入帳要求，直情係眼不見為乾淨嘅掩眼法，無可否認短期可刺激銀行股表現，因為盤數睇落靚番好多，但諗深一層又點呢？
九七翻版 恐跌得仲甘
老編向我舉咗個比喻，佢話按市價入帳嘅要求，如同鮮奶要標明食用限期一樣，目的係畀大家更容易分辨過期嘅鮮奶，不過依家見通街啲鮮奶都過期大冧價，為求打救奶商，於是廢除標明食用限期嘅規定，消費者「睇唔出」過期，奶商咪照賣可也囉。嘩！撕走個食用限期標籤，壞奶就變好奶，世事咁簡單仲有金融海嘯？
放寬按市價入帳要求，仲可能會打亂「PPIP」收購有毒資產計劃。當初銀行持有嘅「毒產」因為無人肯接逼住大冧價，喺按市價入帳下，自然搞到盤數爛晒。美國為咗幫銀行止血，推出PPIP，希望促使「毒產」成交，一來有市價參考去入帳，二來可幫銀行送走「毒產」。但依家可以唔按市價入帳，銀行仲點會肯賤賣「資產」，不如用個高於市值嘅價值入帳好過。如果係咁，不但銀行盤數反映唔到呢批「毒產」嘅價值，仲會令銀行續持呢批炸彈。再爆嘅後果，留畀你自己諗喇。
牛市重臨定係熊市反彈？我做咗個「災後180」統計，意思係統計過去幾次股災「谷底」後180個交易日嘅恒指表現。截至上周收市，就係去年十月二十七日10,676點低位後第109個交易日，你睇睇幅圖，我個人覺得今次走勢同「九七股災」後情況最相似，如果今次真係抄番上次個走勢，近期升市只算係反彈，之後跌得仲甘。
6%人估滙控穿30蚊
上周銀行股做好，滙控（00005）成為今年首季表現最差嘅藍籌後，即刻生性番，3日間升咗16%，依家股價升穿50日平均線，收報49.45元，係咪轉勢？今次《東方產經》網上民意調查問股友，其實大家認為至今年底滙控目標價係幾多？截至上周六晚上六時結果係76.9%認為50元以上，介乎30至49元有17.1%，睇跌落30元以下都有6%。
睇完成篇文，你可能會覺得我一味唱淡。講真，我係咪淡友根本唔關你事，最重要係你自己點分析個市。既然你哋漸轉樂觀，就當我潑你冷水，只想你多角度諗真啲。可能你炒股為咗贏牙骹，但我覺得贏錢更重要。