本文重點
企業收購日日有，通常被收購者都注定被人「蝦」，不過世事無絕對，好似野村證券，呢間日資大行去年九月收購已倒閉雷曼兄弟亞洲業務，竟然送佛送到西，請番原本由雷曼兄弟招聘來嘅大學畢業生，人工仲較自己請來嗰批多成一倍半，令人驚奇。
人工高過「自己友」倍半
同工不同酬幾時都令人氣頂，相信由尋日開始返工嘅野村新人就更氣頂，無他嘅，同時四月一日愚人節開工，二十位由雷曼兄弟招攬、家陣由野村接收嘅新人，首年人工就有六百五十萬日圓（約五十一點四萬港元），反觀由野村自己請回來嘅七百位大學畢業生，頭一年人工只有二百四十萬日圓。
日本公司通常早於大學生畢業前一年已發出聘書，待每年三月底學年完結，新人在四月一日正式上班，野村今次未知是否為了幫埋雷曼兄弟信守諾言，所以人工較自己請嘅高成倍。
其實，上年十月野村「接收」雷曼兄弟八千位伙記時，也保證其人工和花紅不變，財務資料顯示，雷曼兄弟員工平均收取三十三點二萬美元，同時期野村員工則平均收取十四點四萬美元。
睇嚟野村今次如此安排肯定會製造矛盾和衝突，員工之間嘅不滿，亦會令野村嘅人力資源投資較難取得回報。
余絲韻