本文重點
其士國際（00025）創辦人周亦卿年屆七十有餘，絲絲知道佢有實業家精神，永不言休，工作量一直有增無減，但尋日其士公布人事變動，周亦卿唔做董事總經理（M.D.），但繼續做主席。
同時其士亦公布，請埋前水務署署長高贊覺做公司非執行董事，相信可以為其士發展建築及工程方面業務，每年董事酬金為10萬元。
續做主席 無解釋原因
通告無解釋周亦卿辭任原因，雖然佢唔退任，但其實其士仲有一位董事總經理郭海生，喺七二年已加入公司，對公司嘅運作瞭如指掌，同埋個仔周維正喺二○○○年已加入其士，對公司業務已上手。
睇番其士嘅年報，周亦卿喺七○年創立其士集團，至今已經近四十年歷史，業務多元化，包括物業發展、物流、旅遊代理，以至餐飲業，佢同時係多家上市公司嘅獨立非執行董事，當中包括萬順昌集團（01001）及港華燃氣（01083）。
余絲韻