本文重點
各大企業陸續公布業績，所以絲絲近日都睇實聯交所個網站，睇睇邊間公司上載咗年報，絲絲關注嘅梗係企業高層嘅人工啦。大家都知一場金融海嘯，令唔少企業盈利輕則大倒退，重則盈轉虧，能夠保持盈利增長嘅公司百中無一，中移（00941）算係少數有盈利增長嘅公司。
認股權公允值大減
喺董事長王建宙領導下，中移成功克服雪災、地震嘅天然災害，舊年盈利首次突破千億元人民幣大關，但中移上載年報卻顯示，王總舊年董事酬金竟然大減37%至314萬元，絲絲即時大叫「有無搞錯」！後來睇清楚，先發覺王總人工「被減」只係因為佢嘅認股權公允值減少，大概係舊年中移嘅股價因市況逆轉而「唔見半截」，搞到股價同認股權行使價嘅差距收窄有關，查實睇番王總同一眾中移高層舊年嘅人工同花紅都冇變到。
至於網通前董事長張春江舊年因為電訊業重組而過檔中移，於舊年六月五日正式被委任做副主席，張總做咗唔夠七個月，連帶花紅、津貼，舊年既董事酬金一共120萬元，都算唔錯。絲絲有興趣知道，張總計埋舊年上半年喺網通所賺既人工，加加埋埋會唔會高過王總呢？
余絲韻