四月一日愚人節，港股也幽股民一默，一個假動作先高後低，將好淡兩邊陣營都呃晒，季結及滙控（00005）供股權買賣塵埃落定，成交仲有529億元，比前日多40億已算唔錯。
一些跌得殘的內房股，繼續被基金經理大玩炒落後遊戲，富力地產（02777）昨報收9.8元，升0.8元。去年第四季唔少大孖沙仲驚緊富力財政可能出問題，不過，富力公布今年首季銷售表現標青，收入61.5億元勁升八成，係富力成立以來最高紀錄，而且趁業績曝光，管理層發表新一年賣樓目標，畀到市場驚喜，估計全年銷售額220億元人民幣，比○八年仲要多。
大戶驚自己睇錯市，急急補貨形成三月初開始，一浪接一浪的強勢。富力去年股價實在被沽得太殘，假如銷售達標，還債問題應該唔大，單是炒短期大行修訂預測，已經夠水位，第一站目標睇12.5元。
航運股同內房股情況有啲似，一樣被睇到世界末日，當市場氣氛漸趨緩和，基金清晒倉的航運股，近期亦有炒落後之勢。招商局（00144）趁壞消息反映得八八九九，近期靜靜起革命，尋日即市測試過18元低位，印證10日線17.85元支持力唔錯後，即升至18.78元收市，走勢唔錯，短線可繼續睇好，目標看22.5元。
另一隻落後心水股係中國遠洋（01919），現價5.1元比年初的5.8元仲要低，二、三月份中遠股價幾乎原地踏步，但留意到近兩星期平均成交增加，似是大戶收集，股價待變之勢，如果短期挑戰5.8元成功，將會是一路奇兵。