又講番Ivey，佢尋日打嚟話走甩咗隻YEN真係好慘，前晚隻YEN跌穿99，尋日仲跌近99.50，原本兩日就執到二百幾三百點，結果得個吉。前日我喺1.3235沽咗一手歐元，本來諗住沽到星期四，等歐洲央行公布埋個議息結果先算，但都係等唔到，唔係我冇耐性，而係隻歐元跌極都守住1.32。
尋日下晝，德國公布個二月份零售銷售差過預期，但隻歐元跌到1.3167就好快升番轉頭，所以後來見佢上番1.32反覆，隻鎊都企番上去1.43廿幾，隻澳元又由0.68五十幾上番0.69，而隻YEN就散番到接近99，我直覺認為隻歐元好快升番轉頭，所以喺1.32邊平倉。
後來留意番隻鎊，我見佢呢幾日都企穩1.43，下晝英國公布二月份製造業採購經理指數，記憶中，近期英國公布嘅數據都唔係差，好似上次公布嘅零售銷售就大升，所以估個採購經理指數可能好過預期，所以喺1.4326揸番一手鎊。果然，隻鎊唔使一陣就彈咗上去1.43四、五十，之後公布嘅嗰個採購經理指數升到39.1，隻鎊衝過上去1.44，如果升破番條10日線1.4448，好大可能展開新一輪升浪。
蘇小妹