本文重點
近年灣仔區大搞市區重建，不少投資者都加入收購舊樓行列。Vincent八到，大鴻輝興業或有關公司嘅太原街與皇后大道東酒店項目，已收到超過90%業權，同埋重獲批可以喺今個月二十四日強制拍賣未獲得所有業權的太原街55至57號及麥加力歌街6至8號一幢舊樓，開價5,500萬元。
項目申請續期惹爭拗
第一太平戴維斯老友透露，上述太原街及麥加力歌街舊樓，喺胡忠大廈斜對面，只剩番一個住宅戶業主未決定賣，揸住上址逾九成業權嘅大業主根據《土地（為重新發展而強制售賣）條例》，成功申請將上址拍賣。
唔少發展商為免旗下項目被減發展密度，要不時留意已批申請有無過期，Vincent發現，土瓜灣好收成空運中心及金賜工業大廈，因申請續期而同城規會鬧意見，話說有關規劃許可早於○三年批出，但一路無發展，至舊年底距離到期日僅六日時先申請續期，等到城規會兩個月內排期審議時已過期，最終就續唔到期，發展商唔服要求覆檢，覆檢會在明天審議，不過，規劃署已諮詢法律意見，仲話無權批准過咗期嘅申請，屋宇署亦已拒絕圖則申請。
至於好收成空運中心亦同時提交另一個起住宅的規劃申請，但因密度過高而攞唔到規劃署嘅支持。
（Vincent Lau）