捱熱着潛水衣 孖馬德鐘出外景 陳煒中暑：背脊似鐵板燒
陳煒日前拍攝一場潛水戲，由於天氣太熱兼着住焗身潛水衣，令她一度中暑，突然眼前一黑，需立即坐下休息「降溫」。而擁潛水教練牌的前港姐何泳芍當日為陳煒擔任潛水替身，她坦言不介意。
藝人馬德鐘、陳煒及何泳芍（Honey）日前於烏溪沙為無綫劇《雙生陌生人》拍攝外景，陳煒因高溫天氣而出現中暑症狀，需於路旁休息，過了一會才能受訪及繼續拍攝，她說：「頭先要拍坐快艇戲，因為着住潛水衣，加上猛太陽曬住，件衫吸晒熱力，感覺到背脊好似成塊鐵板燒咁，拍完諗住行去架車度休息，點知行行吓突然眼前一黑，不停標冷汗，妝都溶晒，休息咗陣先可以繼續拍。」她指自己的廠景早已完成，近來也多數出外景：「本身拍呢套劇好舒服，不過近排天氣實在太熱。」
何泳芍處女做替身
當日拍攝場口是陳煒乘快艇出海潛水，因她本身不懂潛水，遂由Honey作潛水替身。陳煒很感謝對方幫手，至於會否有興趣去學？她表示：「冇啦，頭先中完暑我真係enjoy唔到水上活動。」而Honey被問到會否介意做替身？她笑稱絕不介意：「今次係第一次做替身，好多演員朋友同前輩都做過，所以有晒心理準備，既然我有呢個專業，都係想完成件事啫！（以後潛水戲都搵你？）我唔介意！」
至於馬德鐘在劇中變身「暖男」老公，會執海星氹老婆陳煒，談到今次一人分飾兩角，他說：「拍攝時間一定多咗，化妝set頭要不停換，不過係好難得嘅經驗。」他還大讚陳煒真人與角色一樣，同屬賢妻良母型，經常「萬歲」。