《明星運動會》傷兵滿營 關嘉敏捱重拳爆喊 降Cup加操

日本東京奧運會將於下月23日揭開序幕,無綫為配合相關宣傳,動員200多名藝人出戰明星賽。其中參加拳擊項目的藝人個個當正自己是真拳手,密密操練,未到總決賽已「五勞七傷」。組合Bingo成員關嘉敏,無懼練習時被擊倒,日前抽空到海旁加操,瘦到縮胸的她,誓要登上「無綫女拳王」之位!

無綫《明星運動會》分9個項目進行,包括足球、射擊、游泳及乒乓球等,讓參賽藝人盡show運動才能,當中最受關注一定要數拳擊,事關無綫找來拳界名人陳文義負責操練一眾選手,參賽藝人在他鞭策下拚盡全力應戰。日前舉行館內賽後,紛紛傳出受傷消息,最嚴重應該是「前港男」杜沚諾被崔建邦的無情力打裂兩條肋骨,「東張主持」潘梓鋒被羅孝勇打到變熊貓眼,而謝東閔右手韌帶亦告撕裂。賽事將於明日(15日)進行第2回合甄選賽。

女子組亦非姐手姐腳,本身有功夫底子的關嘉敏已成功躋身甄選賽,不過機會得來不易。據悉她同時參加了無綫即將推出的街舞真人騷,這段時間要抽空兼顧練拳,每日只瞓得2、3小時,期間要遵循指引「落磅」減4kg應戰,故每日冇啖好食,只以白烚雞肉醫肚。日前她被發現與好友朱斐斐身穿運動背心及短褲,現身觀塘海濱長廊跑步練氣及練拳,本來身材不俗的她瘦到上圍縮水,反觀朱斐斐依然「胸狠」,跳繩時更加big波蕩漾,相當吸睛。

有傳關嘉敏與另一參賽者李君妍日前對打,被對方打到頭暈暈,更突然爆喊嚇呆在場人士。事後記者聯絡上她,她說:「當時所有嘢發生得好快,嚟唔切反應,成個人轉咗幾個圈,聽到人話驚我甩牙,加上真係好痛,所以先會喊。(打完比賽就唔再練拳?)唔會,反而愛上咗,不過嚟緊7月拍劇,係驚冇時間啫!」

前港男杜沚諾傷肋骨退賽

另外,因練拳受傷的謝東閔昨日受訪,仍未決定是否退賽:「隻手其實冇乜力,我驚上台畀人打多。」杜沚諾則明言已不能繼續打擂台:「兩條肋骨裂咗之外,仲有一條彎咗,預計要個幾月先好番。當時阿邦未出全力,我都唔知自己受傷,仲同海俊傑對打完成館內賽。阿邦出錢畀我睇醫生,又成日問候我,受傷嘅嘢大家都唔想,呢段時間我學咗好多嘢。(影響工作?)好彩呢排我主力拍廣告。」而潘梓鋒「毀容」後仍繼續《東張西望》主持工作,惟有靠上厚粉遮掩眼部瘀傷,並希望眼睛盡快消腫。