楊思琦廚藝一般 老公嫌棄
2001年港姐冠軍楊思琦，早前參加ViuTV真人騷節目《中女唔易做》，她笑言不介意被列入中女行列：「以前中女係貶意，依家好正面。試過聽人講中女變豬扒，我又唔認同，中女唔等如豬扒！」節目中，她要做4份工，包括賣花、賣台式珍珠奶、賣水果及派傳單。她坦言覺得派傳單最辛苦，除了「機械式」派發外，還多次食檸檬：「好多人有情緒，眼神少少不滿，有啲講埋出口話趕時間，語氣好難受，不過我都明，有啲人好趕，所以最後都唔放上心。」
她自爆母親節當日，與媽媽在家食飯慶祝，覺得日日都是母親節，一齊食飯已感開心。至於父親節，她說：「可以安排先生同爸爸一齊慶祝，簡單食飯，睇吓會唔會先生落廚，佢煮嘢食好好味。不過同佢慶祝，叫佢煮就好搞笑！其實佢平時都有煮，最拿手整清湯腩，整得好食過出面。（你落廚？）如果我煮，佢就會話不如佢煮，我廚藝好一般。」