前無綫編劇爆男演員加戲 蕭正楠:我反而會改短

ViuTV節目《晚吹—又要威又要戴頭盔》新一集找來前無綫編劇爆料,他指有男演員臨時改劇本自創身世,及加入跪地喊戲圖演技大爆發,令整個劇情方向有出入。

昨晚蕭正楠、湯洛雯與馮盈盈演出無綫節目《開心大綜藝》,對於有藝人改劇本,蕭正楠表示:「有時對戲大家會執生,見到劇本唔順會改少少,相信啲編劇會明白,只係執順但唔會大改。(有男演員加跪地戲?)如果呢個情況,我一定唔會加自己戲,反而會改短,好睇個人,唔清楚當時情況。(編劇話唔可以跟場,好多嘢都唔知。)呢樣一直都係咁,編劇工作量好重,作為演員,如果有編劇去跟場,絕對係歡迎。(編劇覺得唔受尊重?)我冇睇過有關節目,但如果單憑以上幾點,就唔係唔尊重。」

他開玩笑指湯洛雯最喜歡改劇本,女方即否認:「我點會,我咁鵪鶉!其實演員好少大改劇本,改少少就會。」而馮盈盈自言拍劇經驗尚淺,不夠膽改劇本:「我冇見過有人改,有時一班人一齊對稿,有新諗法都係成班人同導演一齊商量。」