阿嬌為新片增肥 1日5餐食到嘔
鍾欣潼（阿嬌）最近因為突然脹爆，面圓圓現雙下巴，肥到頸都冇，加上凸腩巨躉，迅即成為全城熱話，不過在粉絲眼中阿嬌雖然肥，但依然是女神。原來她忽然脹大兩個碼事出有因，是為即將開拍電影而谷肥自己，該片類似多年前的韓國電影《醜女大翻身》，並加入新元素，不過因內容屬商業秘密，所以有關參與者均未能向外界透露細節。
據知阿嬌為了新戲角色決定豁出去，拋棄女神形象，為達到角色所需磅數，刻意1日最少食5餐，不斷暴飲暴食，不肥不食，到最近終於有所「成績」，從昔日的零死角女神變成「冇頸的肥妹」。她坦言接到劇本也考慮了一陣子，覺得是一個機會：「好開心可以挑戰唔同嘢，平時都鍾意食嘢，今次可以名正言順去肥。」事實上增肥過程都好辛苦，她試過食到嘔，食到胃痛胃抽筋，但因簽了保密協議，不便透露太多。