史嘉娜 麥克韋化奴 杯葛金球獎

舉辦《金球獎》的荷里活外國記者協會被批評涉種族歧視後,「變形俠醫」麥克韋化奴(Mark Ruffalo)與「黑寡婦」史嘉娜祖漢遜(Scarlett Johansson)加入發起杯葛,後者更指協會性別歧視!

由荷里活外國記者協會(HFPA)舉辦的《金球獎》,早前被批評欠缺多元種族成員,雖然協會承諾改革,但不少人也認為力度不足。

「幾乎係性騷擾」

今年憑《他是我兄弟》(I Know This Much Is True)成為出爐金球獎迷你劇視帝的麥克,加入批評HFPA:「見到因為同電影人以及演員合作而名利雙收嘅HFPA,拒絕好多被佢哋黑箱作業文化影響嘅團體要求嘅改變,令人失望,依家係時候改正以往嘅錯誤。」

麥克續稱:「我哋工業喺呢個美麗時刻應該邁向更加公平,佢唔係完美,亦嚟得太遲,但好清楚乜嘢係應該做同點樣做。今次正義行動畀所有人、HFPA同其他娛樂機構一個向前行嘅好機會,我哋都應該跟隨。」

史嘉娜亦呼籲圈中人齊齊杯葛HFPA,甚至提及他們的性騷擾問題:「作為要宣傳電影嘅演員,要預咗參與頒獎禮同記者會。喺以前,咁樣代表你要接受某啲HFPA成員嘅性別歧視問題,幾乎係性騷擾,呢個係我咁多年嚟唔肯參與佢哋記者會嘅原因。」

她又提到因性侵被判刑的荷里活大亨Harvey Weinstein,以前是HFPA的推手,令整個工業要跟隨:「如果冇根本嘅改革,我哋係時候遠離HFPA,聚焦喺自己工會同工業嘅重要性同團結度。」