譚俊彥譚凱琪 灰爆淚鬥淚

譚俊彥(Shaun)和譚凱琪(Zoie)為新劇要日喊夜喊,早前一場送別愛犬的戲份,大隊在寵物善終中心實地取景,繼續喊到唔停。他們表示每天看着時間表為喊戲倒數,希望盡快喊完,Zoie直言工作太忙少見女兒,感覺囡囡有點嬲豬。

譚俊彥、譚凱琪、陳山聰、趙希洛和阮兒日前到觀塘為新劇《十八年後的終極告白2.0》開工,劇情交代Zoie的角色痛失愛犬,現場她與趙希洛喊出真眼淚。Zoie說幾年前飼養的愛犬離世做過善終,故當她抵達現場嚴肅的環境,已感毛管戙,好容易投射心情,話喊就喊,不過她隨即開心宣布:「今日係喊戲嘅最後一場。」

被女兒冷落

譚俊彥亦認同劇情掀動大家的情緒,每人都以淚洗面,他說:「我有個月曆Mark住,今日我同Zoie係最後一場喊,我自己嗰啲就仲有啲。我本身唔容易喊,希望拍完快啲將負能量趕走,呢幾日休息返去湊仔,成個人開心番。」Zoie則覺得因少時間陪囡囡而遭到冷待:「個女對我反應冷淡咗,以前見親我就笑,依家唔笑,覺得佢嬲咗我,我會好快氹番佢,佢係Cool Baby。」

簽保密協議

同場的陳山聰和趙希洛飾演一對,山聰說:「呢兩個月Keep住好沉重、複雜、唔開心,只有放飯短暫開心,試過有場戲沉重到停機後都唔傾偈。仲有幾日就拍完,想快啲抆走個角色,個角色令我好辛苦,好唔舒服。」他說與監製簽了保密協議,只有6個人知道這部分劇本的內容,不能劇透。希洛角色懷有4個月身孕,自言也受拍攝情緒影響而失眠,要做瑜伽和跑步發洩。