荷里活巨星湯告魯斯（Tom Cruise）主演的《職業特工隊7》（Mission：Impossible 7）拍攝至今歷盡波折，拍攝進度因疫情加劇而嚴重受阻，令身兼主角及監製的靚佬湯壓力爆煲，近日又因小事而在片場發爛渣！
據知，靚佬湯正在英格蘭北部約克郡趕拍《職》，休息期間，附近的大樹被風吹郁，導致樹枝拍打到他與其他演員的休息車車頂而發出聲響，阻礙他們休息，他隨即向工作人員投訴！消息人士說：「好明顯啲聲太大，煩到佢哋頂唔順，結果工作人員急Call兩位工人將車頂嘅樹枝鋸走。」
除了被樹枝激親外，靚佬湯與傳緋聞的同片女星Hayley Atwell，又被到片場「觀星」的Fans騷擾，最離譜是兩名醫護人員放下工作前來拍照，最終被保安人員阻止兼要刪除照片。雖然靚佬湯是事件中的「受害者」，但仍被「天下圍攻」，網民洗版留言批評他小題大做，有人更說：「佢簡直係笑話……絕對係衰神！」更有網民人身攻擊稱他是「臭脾氣的小矮人」：「唔怪得佢留唔住老婆。」
查實今次已非靚佬湯首度在片場發脾氣，去年12月，有傳媒播出一段他鬧人的聲帶，當時有幾名工作人員未有遵從片場的防疫指引，聚集睇Mon而被他爆粗狂鬧，員工最後頂唔順劈炮唔撈！