林作笑鍾培生虛：足夠收佢皮
前港姐麥明詩舊愛林作與「百億富三代」鍾培生將舉行擂台戰，昨日2人分別現身，林作嘲諷對方身子虛才要戒色備戰，自己反而要將愛釋放，更信心十足，指對手凶多吉少；鍾培生則未有將他放在眼內，只會做好自己。
林作與鍾培生於9月進行百萬擂台戰，之前林作會首次參加拳擊比賽《Energy Fight 2021第一回》，近期積極備戰的他，到灣仔一間拳館操練，並與師姐在擂台對打，不過全程處於捱打狀態，毫無還手之力，他笑說：「呢啲風度嚟嘅。」隨後他繼續做「沙包」，展示近期所練的秘密武器「鐵布衫」腹肌。
對於鍾培生表示要戒色備戰，他大唱反調：「佢要戒，佢虛啫，我唔使戒，我滿滿嘅愛要釋放出嚟，我唔煙唔酒好健康，唔係太多色，都係嗰個啫，佢多啲。（佢話請麥明詩觀戰？）我冇參與賽事安排。（有冇嘢想同佢講？）如果打親佢，真係sorry！信心係十足嘅，個幾月前先接觸拳擊，我覺得係人生最大體會，最適合係做拳手，我玩得太遲，佢應該早啲搵我，可能我已經係曹星如個大佬。」
林作學拳20多日已開始收身，他笑說：「唔係好勁，要謙虛啲，不過足夠收佢皮。（被師姐不停打？）呢個策略嚟，唔好睇小佢，佢係專業冠軍，女人都可以好大力，好似屋企嗰個都大力過我，同佢喺屋企有練。（嚟緊第一次打比賽會緊張？）唔緊張，我反而係嗰啲大賽類型，愈多觀眾愈興奮，如果多啲美女助陣會勁多幾倍。」
冇留意對手進度
至於鍾培生昨日現身活動，對於被林作取笑身體虛，他反擊：「自己非常強勁，練得好好，脂肪少咗，增加咗肌肉。依家專注事業，修心齊家，做好自己。（有冇留意對方進度？）唔係好重要，佢犀唔犀利，我都係咁練，自己好有信心。」